أترحم على ذيك الليالي وأجهد النفس والطرقه طويله=سقت رجلي ولابه من فطن لي كل يومن يجي تزداد عله.
ما بقى من زمانن ماصفالي غير حملن ثقل نفسي تشيله=فوق حملي على متني يشلي ثلث هم العرب والضيق كله.
وأعتزي والعزاوي ماتبالي وأتصبر كما سوت بجيله=السنع يرفعك لا مايذلي والردي تكسره عثره مخله.
والرجل يتسم بسمى الخصالي والطروق السويه هي دليله=يرتفع في مقامه لايدلي فرته للطمان اللي يذله.
وقفت وإستدارت من شمالي والثقيله نجيب إلها ثقيله=أرتكي للحمل والحمل حملي وأحمل حمول منهو ضاق حمله.
خال.. مال العيال إلا الخوالي لاإستشك الصبي بأصله يجيله=مايتوّه تراه أصلي وفصلي من نسل يام مايحتاج دله.
مفلحي مذكري والراس عالي منبعي يام إبن يصبا الأصيله=فدعجان العريبه زود أصلي من عتيبه وفالهيلا محله.
إبتدعت القوافي والجزالي مستحيله تعانق مستحيله=مثلها كالمزون اللي تهلي تروي وتغسل كبودن مغله.
ماسبقها أبو زيد الهلالي ماإنوجد منها في ألف ليله=وإزدرت عنتره وأبكيت خلي ثم غزيت المحيط بجور دجله.
خل خاوا خليله من خلالي من بيوتي تغزل في خليله=كم حكيمن تنغنى ثم حكم لي بالنصيحه وأنا نفسي تجله.
وأقدح البيت من ثورة خيالي وأعتلي لابدا فالوقت ميله=من فكر لايمل ولايكلي والرجل ماتهزه أي زله.
جل من يعصمه رب الجلالي النبي والشيوخ أهل الفضيله=وأحمد الله خطاي إن زاد حملي مايضر البشر؟ .. بحتال حمله.