بسم الله الرحمن الرحيم
السلام عليكم ورحمة الله وبركاته
......
بدون مقدمات
اترككم مع الجزاله
<< عذاري >>
الصدر زنزانة وخفّاقي اسير = والفكر عيّن للسان استشاري
والشعر ساحة حرب والشاعر مْغير = والقاف ذود وتحتميه الشباري
ولا يحصل حصته وافيه غير : = ( شوق العذارى لا بسات الخزاري )
وراسي معزب والطواري مسايير = يا مرحبا لبيه يا اغلى الطواري
تلفي علي وافز واصيح واشير = على كرامتها واقلّط فقاري
واشب ضو القاف وتشع وتنير = وتبحص معانيّه بجوف الغواري
وازلّها وسط الدلال المباهير = وامد فنجال الجزال الهراري
مثايلٍ فيها اعجاز وتصاوير = وأنا اتنقاها بحسّب اختياري
مثل الرفيق اللي يدوّر لي الخير = ويشدني عن هزعتي وانحداري
وادوّر لبعض السوالف معاذير = واحط لي منهج واحدد مساري
واحرص على نسل الرجال المناعير = اللي يماريبي وانا فيه اماري
(( فقير )) يحفظ لي وقاري ولا (( أمير )) = يحط من قدري ويضيع وقاري
ابيه لا دارت علي الدواوير = يكون لي عزوة وجبر انكساري
(( خوة شرف )) ماهيب (( خوة دنانير )) = وان غبت ما يرضى علي الهذاري
يا ملّ عينٍ تحبس الدمع ويحير = ويحدها عن الدموع اعتباري
كن في حشاي من الغبينه دوافير = وتحوفني في كل ساعه عزاري
إلى ذكرت الحظ .. فالثلث الأخير = وحبٍ عجزت اقدم إْلِه اعتذاري
تعبت من طول السهر والمشاوير = من جورها حطت بعيني مواري
وازريت للقى للمواجع تفاسير = وعانيت من كبت الحزن والعباري
وسيلٍ من النكبات مامنّه مْجير = لا صرت اداري والزمن ما يداري
هقيت في وقتٍ هدرّ كنّه بْعير = وضاعت هقاويي وطال انتظاري
ان جيت والأقدار شعل ومغاتير = هدّف مجاهيمه هزال وعواري
لكنّ ابسألكم احد شاف لي طير ؟ = خلا ضلوعي واخلِفتْه الحباري
اومي بملواحي وانا مشتحن .. مير = غدا وقفّت به هبوب الذواري
واصبحت مالي قلب يَروى من البير = من يوم ما شحّت بماها عذاري
الشاعر //
ماجد المهنّا الدوسري
أخوكم