[فالح علي]

الا يالله عفـوك لا معـي بيجـر ولا جـوال=ولا عنـدي وضيفـه والتجـاره فاشـلٍ فيهـا

ولاعنـدي شهـاداتٍ ولاحرفـه تسـد الحـال=ولا حـظٍ كبيـر لا اخطـت الجـره يقديهـا

مخابي الثوب تومي مادخلها من زمـان ريـال=بهـا فاتـورة الكهـرب ولا يمدينـي اقضيهـا

علىذيك العراوي تتعب الحادي مـع الجمّـال=ثلاث اشهـور فالورشـه وشهريـنٍ مغطيهـا

ابيها لو تجمّل يـوم واجلبهـا علـى الـدلاّل=يجيها واحـدٍ حظـه مثـل حظـي ويشريهـا

نصيت العسكريّه يـوم قالـوا للنظـام رجـال=وقدّمـت الملـف وصـورةٍ متشخـصٍ فيهـا

خذا الاوراق مني واحدٍ مـا عنـد ابـوه دلال=سلوم الناس واهل المعرفه والطيـب مخطيهـا

قراها في دقيقه والتفـت عجـلٍ علـي وقـال=شهادتك العظيمه يا ولـد ويـن انـت مخفيهـا

هزّيت الراس ماعندي تقول اني مـن البنقـال=وقمـت احـب خشمـه واطلبـه بالله تمشّيهـا

حذفها من يده شيـن الطبيعـه والنبـا والفـال=وقال ازيـن تعـوّد صـوب نوقاتـك تعشّيهـا

تناوشته من الكرسي وعفت الحـل والترحـال=وضربته بالبياله عقـب مـا بيّحـت شاهيهـا

خذوني للسجن لا نيـب لا ظالـم ولا محتـال=مجـرّد واحـدٍ جـا يكحـل عيونـه فيعميهـا

ويوم اني خرجت اقفيت لارض الله وسيع الجال=علـى بـرٍ هـواه يـداوي العلّـه ويبريـهـا

ادوّر قصعة الجربوع والظـب الفتـي يختـال=والارنب يا شفاة الروح ما احلاهـا وطاريهـا

بـلا كهـرب ولا بيجـر ولا غـازٍ ولا نقّـال=قوانين الحضـاره لا تبـي شوفـي ولا ابيهـا