[محمد أبو زيد]

السلام عليكم ورحمة الله وبركاته


جديده ..

لعل وعسى ترتقي لذائقتكم ، وتجمّلنا معكم .

أنا البارحه زاحت هجوسي لذيذ النوم = مثل ماهلال محرّم يزيح ذو الحجّه


هجوسٍ ترادم ، كوم مقرون له في كوم = مابه باب مغلق ماتداهمه .. وتفجّه


شريط السنين الماضيه.. ! فلّته في يوم = وكم مشهدٍ قد مات ، تحييه .. وتسجّه !


خليّ الهموم إن مرتـه ؟ تودعه مهموم = وبعيد المدا ؟ تـلحق على أقصاه ، وترجّه


تسوق العباير لين تقبل على البلعوم = وأكفكف طوارفها .. وتدويّ لها لجّه


تلجلج مثل وردٍ على عيلمٍ مزحوم = راع الدور يقرع نصفها .. ونصفٍ يهجّه


عفى الله عن زولٍ ترك فالضمير رسوم = يزوّل لعيني وين ما أروح .. وأوجّه


عليه الفؤاد من التوجّاد فيه ثلوم = وعليه العيون تجمّع الدمع ، وتمجّه


وأنا خابر إن مالي مصدٍّ عن المقسوم = يالوّ النبات يصدّ من مقدم العجّه !


لكن لو معي من مقبلات الليال علوم = يجوز الفجيعه تصغر .. وتكبر السجّه


سطى بي زمانٍ قد سطى في خيار القوم = وكم قاصدٍ عن مقصده لــدّه ، وخجّه


ولولا الأمل بالوآحد ، القادر ، القيّـوم = يبثّ الحياه بميّت الغصن ويِوجّه ؟


تضيق الدروب ، ويبحل المقصي ، المضيوم = وروابع وريث المجد ماتقبل الحجّه