يا أهل الهوى عيني جفت لذة النوم
تشكي وتبكي والسبب حب خلي
مهما شكيت من الجفا ماعلي لوم
كيف أهتني وصويحبي ماحصلي
يازين مهما صار أنا فيك مغروم
أنا اللذي في حبكم رحت كلي
محروم منك وانت بالمثل محروم
بس أشتحن لك مثل ماتشتحن لي
أسباب فرقانا زمنا له القوم
ماسبب الفرقا عناد وتغلي
أنا أدري إنك يا أريش العين مظلوم
وأكبر دليل دموعك اللي تهلي
وأنا بعد مظلوم لاشك مقسوم
صار الشقا مكتوب ومقدرن لي
أقسم يمين إني على طول مهموم
ماشفت في الظهران شيء يسلي
أردد التفكير بين أمس واليوم
وأبكي وأسامر كل نجم مطلي
وأجامل الجلاس والسر مكتوم
وأرجي عسى أيام المفارق تولي
في خاطري لك شوق وأخبار وعلوم
لكن محلك نازحن عن محلي
صوتك يعانق مسمعي دايم الدوم
وملازمتني صورتك مثل ضلي
ياروح روحي مانسيتك ولايوم
محبتك مثل الهوى ماتملي
سر الهوى غامض ولاهو بمفهوم
لكن رموزه بالصراحة تحلي
للحب في قلبي مفاهيم وسلوم
والعين لولا نظرته ماتدلي
عقب إبتعادي صار في جوي غيوم
أيش العمل ياناعم العود قلي
إحذر ترى اللي في الهوى يقبل اللوم
في جنة العشاق مايستظلي
إن مت في حبك شهيدن ومرحوم
وإن عشت ماغيرك من الناس خلي
وإفهم تراني عايفن لذة النوم
كيف أهتني وصويحبي ماحصلي
الشـــــــــاعر:
مهــذل مهــدي الصقــور