الانسان هذا اقل مايقال عنه مبدع 
بارق الحبّ .. ما تخفيه الامزان=شعّ نوره ولكن ما رجيته
أثر مرّ الحياه .. اشكال والوان=يا غرامٍ .. بديته وانتهيته
صار صدري لعين الضيق .. نيشان=كلّ رجمٍ .. يشوّقني رقيته
ما بقالي لحن من كلّ .. الالحان=ما بدعته ولا شيّدت .. بيته
مير أغنّي .. وانا مانيب طربان=ما كتبت الوصل .. ولا قريته
أقدر . اليّن اللي ما بعد لان=بس .. ليل المفارق .؟ ما قويته
سار دم الحزن في كل شريان=غصب عنّي وانا اللي ما بغيته
يوم سال الكحل من حور الاعيان=كلّ .. دربٍ من الضيقه نصيته
قمت اصدّ العيون .. بقدر الامكان=ويوم دنّقت .؟ في قلبي لقيته
ما ذخرت الفرح . لسنين الاحزان=لين ما شفته .. وجاني وجيته
ليت بعض البشر يشرى بالاثمان=كان .. في كل ما عندي شريته
اشهد ان الجفا .. قاسي وخوّان=منه احاسيس الانفس .. مستميته
واشهد ان اللقا .. وافي وله شان=ما يعيّشك في لوّه .. وليته
الهوى دين .. والهجران ديّان=كل ذكرى .؟ لها دين وقضيته
وان خسرت الوصل مانيب ربحان=غير دمعٍ .. بعيني ما بكيته
بيّض الله وجهه وين .. ما كان=كلّ حبٍ .. بعد حبّه .! لغيته
ما بقا للشعور العذب .. عنوان=غير . طاريّه .. وزوله .. وصيته
كلّ ما هبّ ريح الشوق .! الاغصان=ضعت فأربع جهاتي .. واحتريته
مير جعله بخير .. وجعله امعان=وجعل ينساني الله .. لا نسيته
عاد عيده عليه .. فلان و فلان= وعاد عيدي عليّ .. والبيت بيته
ناصر مناحي