السلام عليكم
متواضعه بين ايديكم اتمنى ان تنال على رضاكم
قلت ااه من جور الزمن والغرابيل..
وقلت ااه من فرقى وليفن توده
ليت الزمن عقب المسرات مايميل..
وعمرك ليا منه مضى ماتعده
ياصاحبي والعمر قافيه تهويل..
عشنا وشفنا الجد وقت الاشده
ووقت الرخى شفنا علومن مسابيل..
كلن على ممشاه فحله يكده
شكل الزمن ياصاحبي فيه تحويل..
يبني قصر عالي ويرجع يهده
يسعد به الطيب ويلقى التساهيل..
ولا الردي يشقى على مايمده
سعيد من قدحه يشب القناديل..
وحزين من وقته عصاه ويضده
والرجل لو همه يدبل له الكيل..
مايشكي همومه لو الوقت حده
كلن يسامر نجمة الليل بالويل..
وكلن يدور خطوة النوم عنده
وانا ليا كثرة علي التعاليل..
يصبح صباحي ماعرضت المخده
تسري علي هجوسي دفوق كالسيل..
سيلن تحدر ماه وانهد سده
مالي ومال الي يحسب المحاصيل..
ومالي ومال الي رصيده يعده
الله واكبر يازمان البهاذيل..
صار الرجل فعله منافي لرده
المال يرفع واطي الناس لسهيل..
والعالي يوطيه لاقل مده
الله يستر لايجي وقتنا محيل..
والله يستر لاتزول الموده