[طرّاق]

ناصر بن يحيى الأحمري ؛
شاعر لايقال عنْه مغمور .. لان اسمه محفور بذائقة كلّ من يبحث عن الجزاله .. صحيح ان تواجده الاعلامي يكاد ان يكون معدوم لكنّه كفيل بإرواء تعطّش الذوائق بقصائده التي تمزج بين :
السهل والعسر , والمكشوف والمبطّن , والتقليدي والحداثي !!
بإختصار .. سعد بن جدلان الاكلبي يوجد منْه نسخه أُخرى وهو ناصر الأحمري
×

×

لن أُطيل عليكم وأترككم مع جنبية الزيدي

لله شكري وتمجيدي وتوحيدي = ادعيه وقت الرخا وادعيه في الشدّه
واعوذ به لاكسا الشيب المواليدي = في ساعةٍ تشخص الابصار منشدّه
من ناره اللي تذوّب قاسي الحيدي = اللي يجازي بها اهل الكفر والردّه
سبحانه أخضع لسلطانه ولا أحيدي = عن ما كتب لي وحكمه ما اقدر اردّه
وأسعى واسدد وأقارب والله يريدي = ولا اعتلى من يد الاّ فوقها يدّه
يارب جنّبني دروب المناقيدي = واجعل دروبي على الطالات ممــدّه
فالشعر لاهو بلا عمّي ولا سيدي = اعدّه احيان وامّا احيان ما اعدّه
ان هجرست به هجوسي دوّنته ايدي = والحبل بـ ايدي ماغير ارخيه واشدّه
وان مابغيته يروح ودربه سعيدي = النفس ماهي على فرقاه منحـدّه
والشعر تالي الزمان أصلي وتقليدي = بابين مفتوحه وبابين منسدّه
فاللي يجي كاش واللي بالتقاصيدي = وتزين مسودّةٍ وتشين مسودّه
ماقال ابو الطيّب لكافور الاخشيدي = مضمونه اليا استحيت من الحكا بدّه
ماكنّه الا العزى في ليلة العيدي = ليل النقيضين وش يثنيه ويمدّه
حتى فصاحة خليل ابن الفراهيدي = ماضاعت إلا على الكورنيش في جدّه
مافيه شيٍ على ماقيل تجديدي = سلام ردّيةٍ يامرحبا ردّه
ودام البقا يالكوميدي والتراجيدي = والصف عامر وهزله غالبٍ جدّه
الصوت بالصوت تنديدٍ وتهديدي = واحد من الفين سيفٍ بارعٍ حدّه
والعاشق يقول ذي جملة مواعيدي = ونفسه من فراق نور العين منضدّه
مايدري ان الغزل ومعاشر الغيدي = ولّى وغابت نجومه قد لها مدّه
الذود هامل من نياق ومفاريدي = ياراعي الذود قل لي كيف ترتدّه
والوقت وجهه تغطّيه التجاعيدي = واشوف فيه القدور السود منكدّه
فيه القروم الحلاحيل الصناديدي = مابين ودّه وهاته هاته وودّه
ماكل صقّار هدّ الطير بيصيدي = حتى ولو هو على ماجاز له هدّه
يلقى التعب من نوى للقصر تشييدي = والضيف لو جاه قالو عشّه وغدّه
فالكفو يجمل ويقري الضيف ويزيدي = وجزاه طيب الخلف عن فعله وكدّه
والفسل طبعه من طبوع المناكيدي = جزاه يهدم رداه البيت ويهدّه
ياليت حلّ العقد نتش العباريدي = كان استوى ملبس الواحد على قدّه
وانفك حبلٍ ملاه الوقت تعقيدي = ويسير في اللازم اللي يقدر يسدّه
ذيب الاواليد وش ذيب الاواليدي = لكن ظروف الزمان موقّفه ضدّه
لو كان كثر الحكا محسوب ويفيدي = بااقول وارجي كريمٍ ماانقطع مدّه
اعيد وازيد ليه اعيد وازيدي = مادام نصف العرب كفّه على خدّه
ياطول دربي وياما اقواك ياقيدي = وانشهد انّه وصل صبري على حدّه
فلا صبر في الزمن غير الاجاويدي = اللي بعضهم يموت ولا انكشف سدّه
والمشكله ماهي بكثر التراديدي = ولاهي اللي عطتني بالنظر لدّه
المشكله كلها جنبيّة الزيدي = قالو شراها وقال مورّثه جدّه