ياصاحبي جيتك اشكي لك من احوالي
جيت ومادامك رفيقي ليه اطولها
العلم ومافيه بأول وآخر آمالي
عندي رساله ولا ادري كيف اوصلها
للي سبتني..وانا من قبلها سالي
ابيك توقف معي وتروح تسألها
وش فيها تفتح علي ابواب عذالي
تحمل النفس حاجه ماتحملها
وش فيها رغم الوفا تتركني لحالي
وانا لجفاها تركت الدنيا بأكملها
ان كان هذا زعل علمها يالغالي
ماكان قصدي ورب البيت ازعلها
علمها واللي يخلي قلبك الخالي
عن ضيقتي وين وصلت من تجاهلها
علمها كم لي وانا ماشلت جوالي
كله علشان مااقلب رسايلها
علمها وشلون لامرت على بالي
اروح واضم صورتها واقبلها
وعلمها كيف انشغل عن كثرة اشغالي
واسرح واغمض عيوني واتخيلها
علمها عني وعن همي وغربالي
علمها عن كل حاجه فيّّّّ تجهلها
وان شفتها دنقت تبكي على حالي
انس الكلام...وتذكر كلمه وقلها
قل:شاعرك.. يعتذر ويعاهدك تالي
انه يرتب حساباته من اولها
ويقول: حتى القصيد اللي على بالي
والله ماعاد اكتبه كانه يزعلها
فهد المساعد