ساريه ضاقت عليه الوسيعه وإنبهر!=والهزيمه قربت!والعرب متداريه
والسما ترسل صدى صوت سيدنا عمر!=الجبل ياساريه...الجبل ياساريه!!
وإحتمى بظهر الجبل وإحتمل لين إنتصر=والفرح عم البشر والبشايرساريه
يامهدي شفت العجب والعجب فيماندر=العجب إنك تشوف الحقيقه عاريه!
في زمان أول ماكانت عجب إلاظفر=وفي زماني شقلبت فهمي وأفكاريه
لاسألتك.. وش جرى؟ قول ماعندي خبر=ومن نشدني قلت مقصر حدود أنظاريه
خلها تمشي كذا من سهر يتبع قهر=خلني بين القصيد ولحون أوتاريه
هكذا طبع الحياة المليئه بالعبر=مرتن نسمع صدى..ومرتن متواريه
من بلاني وأفتخر إبتليته في فخر=من نصا بركانيه إحترق من ناريه
من يجيني فوق خده دموع إمن الكدر=شاف دمعي فوق خدي سيولن جاريه!!
البشر تبغي كذا جامل وخلك بشر=نافق وكذب وبهر وبيع الشاريه
إحذر وخلك أسد لاتعثر في حجر=من تعثر تاكله الوحوش الضاريه!
ضيقتن بي وإستبدت وعاندها الصبر=أعذرهم لاخطوا لين عفت أعذاريه
جيتهم صافي وجوني بنادق تحتضر=منهم اللي طلقته وقفت مشواريه
أتشره... كيف؟ ماني على الشرهه جسر=خوفي لاأحس الخواطر وأضيع كاريه.
ماهو خوف..إلامحبه يجاريها القدر=عزهم عزي ومقدارهم مقداريه.
جيت أبيهم راس مال ودعوني للفقر=ورحت منهم منذبح والبقا في ثاريه.
مشكله..لاصرت بين النميمه والسهر=مشكله..لاصار حبري يبث أسراريه.
مشكله..لاعاند الموج هقوات البحر=مشكله..لاحب حظي جحود أقداريه.
مالقيت اللي يعيف الخطا ثم(ن)جهر=بالحقيقه والنفوس البغيضه داريه.
وينه اللي لاخطيت إنتهض مثل الصقر=صاح صحيت ناصحن ..الجبل ياساريه.