اقتباس:
|
المشاركة الأصلية كتبت بواسطة غصن الذهب
جديده للتواصل
عين تضمك ود ما يحكمه حد
وعينٍ على شرفة غيابك تنادي
ماني بعرفك لا بدت حاجه تصد
ولا عرفتك في المواقف رمادي
تاتي على كينونة القلب و تهد
وياتي غيابك ... مستبد و سادي
1 // 3// وخمس واصابعي تعد
طولت بالغربه و تعبت الايادي
والمركب اللي راح ما جابه المد
مرسى الغلا بعده حزينِ وهادي
حقٍ على الطواش من عقب ما شد
ياتيني محمّل ..... بدرٍ وكادي
ما يدري ان الود في القلب لا بد
يرسل هواجيسي ويسبي رقادي
شيئ يهد الصدر لا جيت للجد
تنتابني الحيره و يرحل وكادي
لكل شخص فعالمي حيز و حد
الا انت ياللي مستبيحٍ فؤادي
و مدام مالي من مسافاتكم بد
وطبع الوفاء ما يستجيب لرشادي
ودام الحكم ف-سعود والعصمه لنجد
و قبايل العجمان....تسكن ب-وادي
و الله لأضمك ود لين انك ترد
واوقف على شرفة غيابك انادي
|
الله الله يا غصن الذهب
ماني بعرفك لا بدت حاجه تصد ولا عرفتك بالمواقف رمادي
الله الله الله الله
1//3// وخمس واصابعي تعد طولت فالغربه وتعبت الايادي
الله الله الله هنااااااااا اتضحت لنا بساطة وبراءة الانثى في هذا البيت كم هو جميل اختلاط الحس الانثوي بالحس الطفولي
لكن يا غصن الذهب
افهم الربط بين العين والشرفه والغياب لكن وش دخل المناداه هنا؟ان كنتي تقصدين انك تنادينه فغيابك لا تفي بالغرض المطلوب فلو قلتي حضورك يمكن احسن لانها الكلمه المناسبه
فالبيت (3) تهد ومستبد وسادي كلها عنف وانتي تبين تقولين العكس وخربت عليك كلمة تهد لان ذكرها هنا لم يخدم المعنى فالبيت فأتى خبط لزق.
فالبيت (6)الطواش يا غصن تاجر لؤلؤ فما علاقة الكادي الا مجبوره على القاف ومفردة شد هل تقصدين بها السفر ؟ فإذا كنتي تقصدين بها السفر اعتقد لو قلتي ما مد راح تكون انسب وارتب من شديد البدو يا متحضريّه
.
البيت(7) ماله اي داعي في اعتقادي حشو خاصة هذي ثاني مره تجي مفردة الود بدون اي جديد
فالبيت الثامن الله الله عفوية الشطر الاول واستخدام الحيره وعكسها الوكاد (بيت ذرب المفردات).اتوا في محلهم فعلا
بعد البيت التاسع انتهت قصيدتك بالنسبه لي والباقي حشو واعتقد انه راح يضر القصيده اكثر من نفعها لها
شوية مراجعه وهدؤ منك لقصيدتك وتصير ميه ميه