ياوجودي على لقياك يا خلّي=وجد من هو مريضٍٍ ماله مداوي
أشهدنك على الخفّاق محتلّي=في محبّتك لا قادر ولا قاوي
قلبي اللي تتلّه بالغلا تلّي=تلّت الدلو فالكنه مع الراوي
(قربته) فوق (سمحه) وإبله تفلّي=ثم سمعت صياح ورميت إفداوي
وإجفلت .. وإستشاطت .. وأقرشت باللّي=فوق (سمحه) ، و(سمحه) كنّها (الواوي)
كل ما لدّ زاد الهم والغلّي=قربت الما هذيك بجنبها أتلاوي !
لا كن الله صلّه للروا صلّي=عقب ماهو دريكٍ هالكٍ ثاوي
وتلّ حبل الرشا ضميان مختلّي=هكذا تلّتك للقلب يا غاوي
يا خشيفٍ على الخفرات متعلّي=نادراتٍ وصوفك تتعب الراوي
نظرتك مثل حدّ السيف لا سلّي=وطلّتك كالقمر في ليلةٍ ضاوي
وشعرك أللّي على الأمتان منهلّي=كنْه شلاّل من فوق الجبل هاوي
أدري إني بكثر أوصافك أمقلّي=كيف أوصّفك يا كمبود ياجااوي
ياحبيبي عشانك جيت أنا كلّي=ماتراعي شعور الحب ما تاااوي ؟
لك ليالٍ مضت ماعاد ترسلّي=صار ليلي وصبحي منك متساوي
كاني أخطيت في حق الهوى قلّي=وكان ما اخطيت في صدّتك وش ناوي ؟
مانقص من غلاكم لو ربع ملّي=لو تروح السنين ويسمح الهاوي
ودام عمري على لقياك يمهلّي=أعرف إن السهر للعين متخاوي
يكفي إنك شعاع الشمس والظلّي=ويكفي إني لـغيرك ما أقدر أهاوي