[نوال]

يبه لايجي في خاطرك من زمانك ضيق

انا جيت افرج كل مافيك من ضيقه

اناخادمك عبدك انا الصادق الصديق

معك لاغدر بعض العرب في مواثيقه

انا اللي ليامن شاحب الهم يمك سيق

نطحته بنفسي عنك لو كنت ما طيقه

علي اليمين ان الله اعطاني التوفيق

وحبل المنايا ماشبكتني معاليقه

لخلي صديقي يحرق ايديه بالتصفيق

وأخلي عدوي يبلع الهم مع ريقه

يبه والشعر فيك يتباهى وفيك يليق

وانا شاعر جاب الذهب في صناديقه

ومدامك كبير في عيوني بكبر طويق

انا ليه مملي دلة القاف وابريقه

يقولون شعرا مايهز الحشا تلفيق

وانا اقول ياشعري حشا ماانت تلفيقه

انا ماكتبت الشعر بالقص والتلزيق

انا ذبت فيه وجننتني طواريقه

كتبته وخليت القلوب النيام تفيق

وقامت تزامح في عيوني عشاشيقه

ولا ليت بعض الناس بين الضلوع يويق

عساه يعذرني لاتماديت بالضيقه

ولا يا عسى عفن تعود على التدنيق

يزوره رسول الموت في كل تدنيقه

ولا يا عسى قرم خذا الطيب فكة ريق

يجي دربه اخضر زاهيات زماليقه

يبه لايجي في خاطرك من زمانك ضيق

انا جيت افرج كل مافيك من ضيقه

{الله يخليك لي ياحبيب قلبي}