[مهندس جدير]

لازم تنبش في الفضايح

مو المدفون مدفون حرام ننشة



ذكرتني بسالفة الله يقطع بليسك من افضع الجرايم على مدى الازمانه والعصور




المهم السالفة ياصاحبي كان لي خوي الله يذكره بالخير "الرجال الحين متزوج وعنده عيال"

وبيني وبينه خوة مو طبعية المهم سنين وحنا على هذا الحال لين دخل بيني وبينه فتان وهم الله يستر

على الفتان وقالي انا امس كنت بالمجلس وخويك فلان كان هناك وقال عنك انك مصلحجي

وانه ماشي معك مجاملة وانه هو اللي عطاك وجه ....الخ من الكلام الفاضي والمهم طار عقلي

وصرت ماافكر الا كيف اتوطى ببطن الرجال المهم وصارت اجتماعات بيني وبين عيال عمتي

وبعض الشباب الطيبين شرواكم. وانتهت بالتوصيات التالية:

1- اقوم انا وواحد من عيال عمتي بالمرور على الرجال وعزمه على الخروج معنا لغرض التمشية تمويها له.

2- نضحك عليه بشراء عشاء لأكله خارج المناطق السكنية يعني (بالبر).

3- نتواعد حنا والشباب عددهم تقريبا 11نفر على سيارتين عند المنطقة اللي نبي نتعشى فيها.

4- كلنا 13 نفر نعطيه من العلم الطيب ضرب ,كسر رجل ,تفقيش.....كلا حسب اختصاصه.

5- اثنين من الشباب يقومون بتوفير ادوات المضاربة (عصي, مرزبة, ....الخ)


وبعد ماخلصنا الاجتماع سلمكم الله قررنا التنفيذ بكرة على طول بس في شئ ماحسبنا حسابة













وجود جواسيس في المجموعة والصدمة انه طلع ولد عمتي بعد الاجتماع والتأكيد على الشباب

لاتنسون بكرة وتعالوا بدري ومن هالهياط سلمكم الله الاجتماع طبعا كان قدم بقالة الحارة

الرجال استنا لين كل واحد منا طس لبيته ودخل على البقالة ودق على تلفون بيت الرجال

اللي بينظرب "ايام قبل الجوال" وابو الشباب عطاه كل شئ صار بالاجتماع على اساس انه صاحبة




والمهم يالحبيب وجاء وقت التنفيذ رحت انا والخائن ولد عمتي للرجال والله مالحظة شئ عليهم

المهم قلنا للرجال اطلع معنا نبي نصفقك اقصد بنتعشى معك برى الديرة المهم والرجال يسحب

يدي ويد الخائن وحلف الا يقهوينا ويعشينا ذاك الوقت دور وجهي ماعاد لي وجه من الرجال

المهم دخلنا وماقصر الاجودي ونسينا خويينا بالبر لافي جوال ندق عليهم ولاشئ.



والخائن اكتشفته بعد 6اشهر وصدفة على لسان الرجال الاجودي تخيل انك تكون معصب وتضحك

بنفس الوقت هذا كان حالي ذاك الوقت ....................واااااسف على الاطالة لكن موقف يستحق الذكر



بس سلفتنا ينطبق عليها المثل اللي يقول "رب ضارة نافعة"

يعني لوذاك الوقت طلع معنا الرجال وصار اللي اتفقنا عليه واكيد بيجيه شئ هذا اذا ما مات ايش بنسوي

ذاك الوقت فلابد ان الواحد منا يحكم عقلة كل مااذكر السلفة احمد ربي ان ربك عداها على خير ولاصار شئ