السلام عليكم ورحمة الله وبركاته
هذي القصيده كتبها اخي العزيز والغالي ناصر بن سعد البرغش العجمي , بشهداء الاديرع
وهو شهد الحادث بعينيه , كونه زميل للشهداء,,,( الله يرحمهم جميعا )
صح انا نقلتها متأخر شوي بسبب ظروف خاصه.
واعيني اللي جفف الحزن ماها = من عقب شي(ن) شافته ليت ماصار
ياليت ذاك اليوم جاها عماها = يومن يخلي راجح العقل محتار
يا شيب عيني عقب فرقى إخوياها = يا شيبها من عقب وافين الاشبار
راحوا وعيني مانفعها بكاها = راحوا وخلولي من العز تذكار
تذكار ربعن ليت رحنا فداها = ياللي عليمن بالخفايا والأسرار
يالله عسى الفردوس يالله عساها = مقرهم يالله يا خير غفار
أيامنا دارت ودارت رحاها = إنعدها وتعدنا سر وجهار
ياوجد حالي وجدها من عناها = وجدن يهد طويق ويهد سنجار
لو إن غيري في حلومه رآها = يصبح وعينه تسكب الدمع مدرار
ويعيش يومه ضايقن مانساها = يا كيف ؟ منهو عاشها يوم الأقدار
دنيا تجدد كل يومن غثاها = وانا على ميلاتها شبه صبار
تاخذ ولا توفي لمنهو عطاها = وإليا عطت تعطيك لوعات وامرار
هذي هي الدنيا وهذا قضاها = والعمر مقفي والفلك دوم دوار
دنيا عسى المعبود يدفع بلاها = الواحد الرحمن النافع الضار