فـدوة عيونـك يامحبوبـي فديـت عيونـك
واحــدٍ لاقــوّم الـدنـيـا ولاقـعّـدهـا
خـل سكينـك تغلغـل ليـن يكبـر كونـك
طعنتين .. وطعنتين .. وطعنتين .. و عدها!!
تل قلبي وأحطب ضلوعـي وأنـا ممنونـك
خلّهـا بيديـك واحدهـا تـلـو واحـدهـا
كـل ماتليـت واحـد قلـت لـك ياعـونـك
كنّـي أرفـع معنويـة ايديـك واساعدهـا!!
لأجل ماأرسم شامة التنكيـد بيـن جفونـك
اتظاهـر لـك بعافيتـي !! وأنـا ماجـدهـا
إنس مرّة قلت لك مالي دخـل فـي شونـك
وأعرف أنّي معتـرف فيهـا وأنـا جاحدهـا
الغنـي الله مابـي جـرد السنيـن بدونـك
لو تصيـر أغلـى سنينـي كلّهـا وأسعدهـا
لا تخاف .. القلب قلبك .. والطعون طعونـك
والحنايـا رهـن رمـح مـنـك ياسيّـدهـا
أجرح .. أذبح .. سو ماودّك ترى مجنونـك
مايواعـد طعنـه الاّ جـات فـي موعدهـا
تحرسك عيني عسى الله يحرسـك ويصونـك
يوم طيـفٍ مـن جفـاك وغربتـك عاودهـا
ما أستعيـد الذاكـره ليـن أتهجـى لونـك
كنّـي أدوّر بوجهـك حـاجـةٍ فاقـدهـا؟!!
وأن نزل شوفـي علـى تفاحـك وليمونـك
مالـي الاّ عظّـة شفاهـي تحـت ناجدهـا
وأن جذبت من اللحون اللي سـواة لحونـك
ودّع الله ليلتـك !! وأسـهـر ولا ترقـدهـا
أنت ملهمني وأنا في الشعـر ابـن لعبونـك
لاطلـب منـك الشهـادة زور .. لاتشهدهـا
والله أن أهزّ خصـرك قبـل أهـزّ شجونـك
لا أنحنت روس القصايد .. وألتوى ساعدهـا
عادتي ماني بخونك .. وأن بغيـت أخونـك
قلـت ميـد الفاتنـه لامـن عطتنـي يدهـا
كنّ فنّ الشعر مستوحى مـن أصـل فنونـك
والفراهيدي بحـور الشعـر منـك أوجدهـا
إنسي أسمك .. وأنسي أيّـة عالـمٍ يعنونـك
والبسي ثـوب القصيـده وأقعـدي مقعدهـا
فدوة عيونك يارعبوبـه .. فديـت عيونـك
شـاعـرٍ لاقــوّم الدنـيـا ولاقـعـدهـا