الحزن ما زال والمخلص لو ان عبرته
دمعة على ذيب نزّلها حـزن شالحـه
القادر الله وابـن آدم حسـب قدرتـه
يا العالم الصالحه والعالـم الطالحـه
ومداوي الجرح كفه ترتبـش وابرتـه
ما ترحم الجرح وانياب الالـم كالحـه
لكن نبـي الله محمـد آثـر هجرتـه
ما زال قدوة شموخ الانفـس الفالحـه
يا بيته طيبه اسـأل قبـره وحجرتـه
هل واجب ازعل من المذنب او أصالحه
والا اموت بشرف ويموت من حسرته
ما دامه مصالحـي اضـداد مصالحـه
تعيش يمنى الكريم اللي فرش غترتـه
لضيوفه الطيبييـن وبـاع مشالحـه
عزيمة المهتوي لو ما علـى سفرتـه
غير ارخص الحاليه او ارخص المالحه
اخير مـن واحـد ٍ عزيمتـه عفرتـه
لو كان قلبه نظيـف ونيّتـه صالحـه
وسكوتك من الرفيق الخارجه دبرتـه
لا يحسب في صالحك ولا هو فصالحه
ودّك يطلق مـن الفنجـال والا مرتـه
عليك رفقته علي الطلاق مـا تمالحـه