صباح الخير
انا تايه(ن) قلبي ورى الحب مدري ليش=.... وانا ذايق(ن) من سبته كل الاوجاعي
وياصاحبي قلبي تعامل معه بشويش=....اخاف يتفجر من ورى حدب الاضلاعي
انا بيني وبينك موده وملح وعيش=....ومن شان كل اللي مضى قدر اوضاعي
ترى لو تفارق دنيتي مستحيل اعيش=....بدونك حياتي كلها مالها داعي
تحملت صلفات المواقف وحملك ريش=....على شان شوفك لااتخاذل ولا ارتاعي
انا مستعد اجيك لو كان دونك جيش=....اغامر على لقياك لو تقطع ذراعي
وتقابلني بثقل وتغلي ومدري ويش=....اجل ليش تجعل قلبي انصاف وارباعي
مثل ماحصل بين الصحابه وبين قريش=....حصل مع ضمير(ن) لاتوفق ولاانصاعي
ارده واحربه عن طريقك ولكن بيش=....بعزم الضعيف اللي من الوقت منلاعي
فحرام(ن) تسوي في قناة الغلا تشويش=....اذا صرت تفهم قيمة الحب وتراعي