سقا الله قلبي الظامي بذكرا وقتي اللي فات = ويعطيني صبر باللي تبي للحب رجعاتي
بعد طول الجفا والبعد وبعد ماضعت منها جات = ومدامعها تسابقها على الوجنه كسيباتي
تقول الليل مانامه من الاه ومن الونات = أعاني الليل وعيوني من الفرقى سهيراتي
تقول اقضي كثير الوقت وحيده جالسه بسكات = وافكر في حلا حبك وحبي ذيك الاوقاتي
وانا ذالحين بين ايدك جريحه من عنا مافات = وبردانه وابي منك دفا صدرك بضماتي
ابي ضمك وابي لمّك وابيك بدافي اللهفات = تبدّل ناري الحمرا واعيش بزين جنّاتي
ترا دونك طفى نوري وزاد الليل بي عتمات = حداني البعد لهمومي وزاد الهم لوعاتي
تعال انجدد اللي راح ونعدل بالهوا ميلات = ونبقى بالهوا صافين مسرّات ومودّاتي
ضحكت وقلت يالحليلك وانا في داخلي حرّات = ضحكت بشرّ مايبلي كأنه ماهدم ذاتي
وقلت الحين جا دوري وبشرحلك عن اللي فات = ابيك الحين تصغيلي وتفهم للذي أتي
مدام اتحس يالظالم وعندك بالهوا نظرات = اجل وينك وانا ذايب من الفرقى بحسراتي
قضيت الليل من همي قضيته والفكر بشتات = وانوح الليل مكسوره بصدري كل عبراتي
اقوم اقعد واروح اقبل وجفني بالسهر مابات = اقول الاه محروم ورديف الاه وناتي
غديت بهايج بحورك غريق ٍ والبحر غبّات =غريق وحابس انفاسي من شهور ٍ طويلاتي
تمرّ الليله السودا طويلة عدّ واحسابات = ثوانيها ودقايقها اجل وش حال ساعاتي
تخالف بالنظر عندي من الشر ومن الخيرات = اقول الشر هو دربي واجنّب درب خيراتي
وخلاص شعادلك فيني خلاص اللي تحبه مات = شهيد ٍ راح في حبك من اعداد الوفياتي
وشهيد الحب سمّوني وهجرك يالغضي سبّات = ولاني أول وآخر شهيد ٍ بالهوا ماااااتي
الشــــــــاعر / ســــــعود رتيبان ال جويّر