يا حبيـبٍ صـد مافيهـا كـلام
تـلّ كبـدي وأنقطـع معلوقهـا
قـام يفلقهـا وخلاّهـا حطـام
قلت ليه ؟ وقـال عـدّ فلوقهـا
يوم جاء في نيّته نقطـة نظـام
طيرّ طيـور الجفـا بسبوقهـا
عقب كنّا في محبّـه وانسجـام
نقطف ثمار الهـوى ونذوقهـا
ذعذع الهجر ونشى مزن الخصام
وقامت الفرقـا تلـوح بروقهـا
ما يعزيني سوى نـوح الحمـام
شلت طاروقي علـى طاروقهـا
وش حصلّك وانت لك قدر ومقام
لهجتك مـا ينفهـم منطوقهـا
ليه تذبحني وأنا ذبحـي حـرام
ماتضيع عهـودي ولا أبوقهـا
أذكر أني يوم زاد بـك الهيـام
قلت لك سوق المشاعر سوقهـا
مايفيد الرمي من تحت الحـزام
أرم .. من حدب الضلوع وفوقها
صابرن والطقّ ما فـكّ اللحـام
والليالـي شـرّهـا بحلوقـهـا
صار في شخصيتي شبه انفصام
رحت اطشّ السالفـه واحوقهـا
أكثر العشاق في سلـم الغـرام
يفتـح الله ضايعـات حقوقهـا
خاتمك بالمسك يا مسك الختـام
طبت يا شفّ الجروح وذوقهـا
كان عذرك مانـي بقـد المقـام
الخطايـا .. قافلـن صندوقهـا
لكن اصبر لين ابلّغـك السـلام
من عيونن شالتك فـي موقهـا
العيون اللـي تحبّـك بانتظـام
كل بادي ليـل ترسـل شوقهـا