يامرحبا ترحيبةٍ كلها لش
قد قالها ضيدان لاحد ماطاش
وأنا أقول إن القصيده فدا لش
يومٍ طلبتي قلتها لش على آش
ويومه يقول إنه بكبره حلالش
أجل أنا كلي بكلي فداياش
هذي القصيده تكتمل في كمالش
وأكبر دليلٍ هجّنت لعنبو اللاش
لا شاش راسي.. دق ليل المبالش
يبلش قصيدي لا أبتلش في محياش
يا شيخة إحساسي وفكري عنا لش
لبيش ولبا شايب اليوم ربّاش
ياسِعد عينه لا ألتفت في جمالش
ويا سِعد عينه لا زعلتي تفداش
حكيش.. جمالش .. كثرة اليوم مالش
هي منية العاشق ويكفيه حاكاش
ياليت أبويه واحدٍ من خوالش
ولا عمامش كان والله لرعاش
وأصير أنا اللي رابيٍ في خيالش
وغيري بخيالش يبطي اليوم ماعاش
وأصبحش وأقول لش كيف حالش
وأنتي تقولي دونك الصبح لا ماش
قلت القصيده يوم فكري غدالش
يومش طلبتي جاش شعري وحيّاش
دام القصيده هجّنت في جمالش
فنتي هنا بالعين غطْوه مع فراش