سبحانه اللي يدوم وغير وجهه ما دام
بأمره يمد الشفاء و الغمّة يزيلها
العالي المؤمن العدل الكريم السلام
الوالي اللي جميع الخلق والي لها
أعوذ به من شرور الجن و بغض الأنام
ومن عقدة أهل العقود ومن محابيلها
ما يحذفون الحـلال إلاّ عيـال الحـرام
ناس ٍ نغزها بليس وقـام يومـي لهـا
اللي في قلبه صدا واللي في خشمه عرام
و كبودها سود مدري ويش أسوي لهـا؟
الحمـدلله زان الحـال و الحـظ قــام
ولدن لقـاح الليالـي وحملـن حيلهـا
بانت وجيـهٍ تبادلنـي غـلا وإحتـرام
وغابـت وجيـه ٍ تجاملنـي بتمثيلهـا
والحيّة اللي تشيل السـمّ والسـمّ سـام
أقـرا علـى راسهـا وتـردّه لذيلهـا
مابيني وبينكم يا أهل الضغايـن كـلام
إلاّ الفلق .. و آية الكرسـي وترتيلهـا