السلام عليكم
قصيدتي السادسه في هذا الصرح الشامخ واتمنى ان تنال اعجابكم
ياموعد الحب في رزنامة العاشقين***موعد غرامك حرام بمرسمك تشطبه
الحب لو كان صادق مامحته السنين***ماهو كلام المدرس بالفصل تكتبه
والا علامات حبك ياعذابي تبين***شوقي غدا نار وضلوعي تصير حطبه
لاتعتذر عن صدودك لو بعذرٍ سمين***مآكل من طالع العنقود طال عنبه
ياسلسبيل الهنا يالذة الشاربين***لو جيت ظل النخيل اللي يطيح رطبه
تسكن بخضر الفياض وكل قاسي يلين***ياتيك بالطوع مايحتاج تستنهبه
وش عاد وش عاد لو تليت منه الجبين***مايقدر يقاوم اللي بالغنج يجذبه
تملك خفوقي وتترك فيه جرحٍ مكين***وعتاب من هام في دنياك تستغربه
ماتدري اني بشر مخلوق من ما وطين***والآدمي من غروره يفتخر بنسبه
في غيبتك ضاقت الدنيا وقلبي حزين***اسأل عن الصد والهجران ويش سببه
وآقول ياقلب لو تصبر عسى الله يعين***مآكل من طالع العنقود طال عنبه
وسلامتكم