مسّاكم الله بالخير جميع ....
سولف على النوّار والنـود والريـف = همسك رشاش !! وضحكتك برق غيمه
تمطر على البيداء من السيف للسيف= أربع ليال .. وخالـف السيـل ديمـه
منها الغصون تصير خضر ومواريـف = من عقب ماكانـت يبـاس وهشيمـه
سولف .. وبعّد عن حشاي التحاسيف = و دكّ الهجوس اللي بصدري مقيمـه
من شفتـك ياحلـو طعـم السواليـف = القلـب طيّـب .. والنوايـا سليمـه
عطني من أعماقك ثلاثٍ على الكيـف = ترا لهن فـي وسـط قلبـي خريمـه
واغفايتـي بيـن الثنيـن المواليـف = ضمّة غـلا .. فيهـا ميانـه وشيمـه
في ساعةٍ ماهيـب واقـع ولا طيـف = أعـود معهـا للسنـيـن القديـمـه
وأنا من البـارح عيونـي ملاهيـف = علـى رغـد هـاك القـوام ونعيمـه
اللي وصوفه غيـر كـل التواصيـف = عينٍ روت منهـا !! وعيـنٍ محيمـه
ياكيف أببدا فيـك والا أنتهـي كيـف = وأنت العديم اللـي وصوفـك عديمـه
ريـان عـودك يانحيـل السراجيـف = شيٍ يفـرّج لـه !! وشـيٍ يضيمـه
والجمرتين اللي تحت سلّـة السيـف = والشامـه اللـي جاورتهـن يتيـمـه
على صباحٍ بـان فـوق المشاريـف = بيـان نـور الحـق فـوق الظليمـه
ومجدلٍ مالـه علـى أحـدٍ معاريـف = الا يديـك الـلـي تلـيّـم عتيـمـه
الفقر .. ماهو فقـر قـل المصاريـف = الفقـر فقـر اللـي ماحطّـك نديمـه
خذني ودثرني عـن الهـم والحيـف = معك .. أحـس لباقـي العمـر قيمـه
الشوق يمطـر فالضلـوع المهاديـف = أربع ليال .. وخالـف السيـل ديمـه
وسلامتكم
للمبدع / مطلق بن شويه