السلام عليكم ورحمة الله وبركاته
اسعد الله ايامكم بكل خير 
اول موضوع لي واردت أن يكون قصيدة لي ..
وهي موجهـــه للشاعر الكبير محمد الذيـب
أنا اشهد انك ذيب يا محمد الذيب=اسمٍ على مسمى ما هوب الـخراطي
ذيـــبٍ ولد ذيب عطيـــب المضـاريب=عــــــزام بالوقفــات جـــزام ســاطـــي
من روس قومٍ يوم ضرب المشاعيب=وضرب السيوف المرهفـات السواطي
أفعالهم تشطب على الغير تشطيب=كم راس شيخ طـاح بين المــــواطي
عجمــان أهل صمـلات واهل مواجيب=وقول الحقيقه غــير قــول الهيــاطي
يشهد لهم راكــان في شمخ النيـــب=كم فـــارس عنـد الملاقـا يـطاطـــي
من دون قـــــاصر بالقبــايل ولا عـيب=عـلى الحــــروف نحـط كل النقاطــي
والبيــــت مايبنـــى بليـا منـاسيب=والســـفن مـا ترسى بليــا شواطي
وانته علم بالشعــــر ذوق واساليب=حكـمه وادب مـا تعتبطها اعتباطــــي
غديت للشعــار ذنـــب وعواقيـــب=تقــــول بالمــحشـــر ويــوم الصراطــي
متربع عرش الشعر مابها ريــــــب=طيــــر الهــدد ماهــو بطـير الشبــاطي
تكفى يامحــمد ياحصان الأطاليب=تستسلم الطلــيان وســط الرباطـــي
وانا عتيـــبي عـريب الأناســـــــيب= ناصـــل ورى الحــــروه بليـا تباطــــي
ولا عمرنـا نشــرب بقايـا المــغاريب=ودعـــواي والله ما عليـــها غطاطــي
شيبت من شهب الليــال المحاديب= ولا ينــفع الرجــال جبن وتواطـــي
وصلنّي لحمدان ســتر الرعـابيــب=واشــرح ظروفي والتقطني التقاطي
هداج ماهو بالعــدود المــجاديب=مروي النفــوس اللي يجيها انحباطـي
حمــدان ابو راشد خيـار المعازيب=مدات جــوده من جــزال المعاطــــي
وقتٍ عليـّه قــام يلــحق مشاهيب=وانته رصيــدي وانت كل احتياطـــي
وانا معنز لك ولا عنـــك تجنـــيب=وبــالله ثــــم بالذيــب صـــار ارتباطـــي
وان كان ماوردني لصاف المشاريب=لا خيـر في شعر بدعته على اطي
ودي بعــدِ فـــــــي علــو المراقيــــب=ماهـــوب عد ملحسين القواطــي
لو المراجــل تحضر احيــان وتغيـــــب=الحــر يبقــى حــر والبـــوم واطــي
والختـم ماذعذع نسيم الهبـاهيــــب=صلوا على اللي بالشفاعه مناطي
اخوكم :
الشاعر متعب محمد مصلح المغيري العتيبي