الوم نفسي بعض الاحيان والوم=وقتن حدتني قدرته للملامه
رسمت خطي واثري اطيح واقوم =من قبل لاصل عند ذيك العلامه
لن البنادم خطه يجيه مرسوم=من يوم ينشا لين يوم القيامه
ويا قوم يا وقت البهاذيل يا قوم=حتي السلامه منك ما من سلامه
شاخوبك ارخوم وتهاونت بقروم=اللي جماجمها تفاوح قرامه
الحر يجزع وان جزع يضرب الحوم=لو ان صقاره يكز الحمامه
والموت لا من صار في ريشه اثلوم=حول وموقاعه براس العدامه
الحر حرن ما يجي ماكر البوم=لو ان وقته ناوين بنهزامه
والعبد ما هو عن خطا الوقت معصوم=يخطي ويندم بس يرفع مقامه
لا صارت الايام يومن ورا يوم=تعطيه امل في ضل عز وكرامه
ولا صار حظه بين حاكم ومحكوم=يرجع وهو يندب حياة الندامه
خده من اصدوف المقادير ماسوم=ودمعه مثل وبلن تزبر غمامه
وصدره من الايام ضايق ومكتوم=والحزن في عينه ونبرت كلامه
يبني علي الامال والساس مهدوم=والوقت عيا لا يغير نظامه
صحيح لو ما فيه ضايم ومضيوم=ما كان شفت الليل يحزن ظلامه