السلام عليكم ورحمة الله وبركاته
مساء الخير ..
يا مرسلٍ يمي رسالة موبايل
ليت الرساله تطفي النار فيني
والله ما تكفي جميع الرسايل
عن شوفتك يا روح روحي و عيني
لك الغلا و القلب له دوم شايل
و الشوق يغمرني و جرحي دفيني
من عقبكم دمعي على الخد سايل
و العين عافت نومها يا ظنيني
البعد عذبني و سوّا الهوايل
تمضي علي أيام دايم حزيني
أتخيلك يا بعْد كل القبايل
أتخيـل يدينك تلامس يديني
أنت الوحيد اللي له القلب مايل
ياللي خذيت القلب ليتك تجيني
و تشوف حالي عقبكم كيف قايل
متكدرٍ بالي و حالي يشيني
محدٍ ملا عيني ولا لي بدايل
ما غيرك أحدٍ بالهوى محتويني
أسعى لشوفتكم بكل الوسايل
و البعد يعسرني و لا لي عويني
وجدي عليكم يا حسين المثايل
وجد الخلاص اللي يراود سجيني
الله يحقق لي صعيب المنايل
و يزين لي وقتي و حالي يزيني
و آشوفكم و أنسى همومٍ ثقايل
و نعوّض اللي فات بينك و بيني
سعود سعد العتيبي