[الجويّر]

تركت الحب وايامه وخلّ ٍ ساكـن الظهـران = من الربوه توادعنا انا ومدعـوج الاعيانـي

كفاني صدمة ٍ جتني وبرحل واكتم الاحـزان = قسم بالله ماعـوّد ولـو تذبحنـي احزانـي

بعد مافارقت وضحى وصكّت دوني البيبـان = انا وشهوله مشّرع بعدهـا اليـوم بيبانـي

بعز النفس واتركها وبجزم مثلهـا الهجـران = عزيز النفس مايرضا هوان النفس . لاهاني

اذا تبغي تسلطن بي تراني من ظنا العجمـان = انا المنسوب لسلطان.ونفس الوقت شيطانـي

ولاكن مابرا حالي وعظمي تحت جلدي بـان = سوا حب ٍ طفا نـوره بعـد مانـوّر اكوانـي

هقيت الحب مع وضحى دفاي ان جيتها بردان = وياما صدرها الدافي عليه الـراس غفيانـي

أساي ان شفتها فارق ولوني بالاسا مليـان = مناي اللي بعد مثلي علـى المنـوه تمنّانـي

لها اصبحت انا لاهل الهوا القايد وانا الربّـان = لعين الحب ماخلّيت يقـود المركبـه ثانـي

واثاري حبها الوافي تبن من تحتـه الديبـان = وقامت تلدغ بسـن ٍ يفـوق بسـمّ ثعبانـي

من الصدمه وما جاني سبايب سيّد الخـلان = معاد أمّنت بالعالم وشفت النـاس عدوانـي

وحطمني عذابي وآعذابي يـوم خلّـي خـان = ترى غبنه حبيب الروح لامن صار قومانـي

انا والنار والوحده وشرب الشـاي والدخـان = تخاوينا بعد وضحى ونجـم الليـل خاوانـي

حياتي عقبها صارت سجينه من ورا الغضبان = اراجع ماضي ايام ٍ عليهـا اليـوم ندمانـي

ولاكن بجزم الفرقى ولو شحّة علي الازمان = وبعلن توبتي بالحب .بصير اليوم وحدااانـي




وسـلامــتــكــم 000



الشاعر / سعود رتيبان الجويّر