[دمعة قهر]

‏مدري وش الدبره مع ضيقة البال..
واكبر قهر لاجات من دون(سبه)..

تلعب بصدري كنه الصدر منزال..
والجمر في وسط الحنايا تشبه..

كني الغريق الي لمح ضفة الجال..
يبغى النجاه وطامي الموج ذبه..

حاولت اهدي ضيقة البال واحتال..
واقول يازين الشمال ومهبه..

ولقيت نفسي..اذكر الي برى الحال..
ذاك الغياب الي تجرعت صبه..

من دونه الاحلام تشكي للامال..
والذاكره للشوق مثل المنبه..

ماكفكف دموعي على شان ينقال..
(انه قوي يقوى طعون المحبه)..

كفكفتها لاني لقيت الهجر طال..
وانه لقى منهو يسده وحبه..

ماقول هو خاين,.ولااقول محتال..
بس الزمان الي لعب بي لعب به..

مجبور..لو كان بتجافيه غربال..
حكم القدر..يالله تخفف مطبه..

هذي سوات الوقت والوقت لامال..
يشيل مكنون الضمير ويكبه..

مافي يدي حيله مدام الجفى حال..
بيني وبينه..والوصل ضاع لبه..

عساه يهنى في حياته وتنهال..
مزن السعاده والفرح له تصبه..

وعسا همومه ماتحده على اللال..
وعساه مايشكي لاحد غير ربه..

اكذب واقول اني نسيته..ولازال..
يجري مع دم الشرايين حبه..

هذا هو المكتوب..لو هو برى الحال..
اللي ( احبه ) ..راح للي( يحبه )..