لبيه ياصوتٍ ورى حدب الاضلاع=تسمع صداه اهل القلوب الفطينه
عقدين من بعده معاليقي اجياع=وجوع لمصافح يميني يمينه
اغيب مع ذكراه وافيق وانصاع=واسج واسرح بين رمشه وعينه
شوقي سحاب وذكريات الغضي قاع=اسقيتها دمع العيون الثمينه
في شاطي الذكرى بلا ريح واشراع=مرسى الالم والذكريات الدفينه
احيان احس اني محطه للاوجاع=واحيان صدري لسعاده مدينه
واحيان احس اني مكبل وملتاع=ويجلدني افراق الضنين لضنينه
واحيان مع قلبي نزاعات واصراع=حتى يجدد لي غلاه وحنينه
انزف الم والناس تعتبره ابداع=وأثير بالشعر القلوب الحزينه
تطرب على صوت التناهيت الاسماع=والناس ما تدري عن الجرح وينه
ليلي سهد .. يوم المخاليق هجاع=يمضي وانا ما شفت منه السكينه
اسمع خبر جرحي مع الناس ينذاع=ياهل ترى بتإيّده او تدينه