*
لاعرّجت رجلي على نايف الصوح .........
.........جتني هجوسي من جميع النواحي
ولا غمّضت عين الخلي بارد الروح .........
.........يمرني ليلي مرور الصباحي
تقول كن الليل جايع ومشفوح.........
.........يقلط على صدرٍ ملته الجراحي
ماهيب ضيقة بال يومين وتروح.........
.........كبرت عليّ وخاطري ما إستراحي
أركي عليها دلة الصبر وتفوح.........
.........أبطيت أجاهدها بعزم وكفاحي
وكم قلت ياصدر التشكاي والبوح.........
.........لايكشف ستارك قليل الصلاحي
من عادتي لازادت جروحي جروح .........
.........أنهض إلى من طحت وانهم مطاحي
ومادام ياشايع لك الصدر مفتوح .........
.........وعندك وناسة خاطري وإنشراحي
بأعلمك بأيامي الغبر والكوح.........
.........وتجاربٍ ضميتها في جاحي
تدري وش اللي يوجع النفس والروح.........
.........لاقل مالك والموارد شحاحي
وإعتاز لك من لاقصر عنك الشوح.........
.........ثم إقصرت يمناك دونه وراحي
أكبر مصيبة ترث الدمع والنوح .........
.........إلى إعتذرت ولا حصل لك سماحي
*