[ماجد المهنا]

السلام عليكم ورحمة الله وبركاته


متواضعه .. اتمنى ان ترتقي لذائقتكم


صلو عــ النبي

إن كان حبي يابنيـه ينتظـر لحظـة جـواب ! = والله ان حبك يضخ الدم فـي مجـرى الوريـد
مستعـد أقبـل عشانـك كـل أساليـب العتـاب = من ولد عمي واخوي .. ومن قريب ومن بعيـد
والله إن حبك غزاني .. وانفتـح للحصـن بـاب = وعيّنـوك القايـده للحصـن فالعهـد الجـديـد
يا سيده .. يا واليه .. يا حاكمه .. عادي شبـاب = المهـم قلبـي أمـانـه كبلـيـه بـكـم قـيـد
لا صار بك مجنون خلقه فــالدواء ماهو شـراب = ولاهوب سلكٍ للمغذي يتصل فـي عـرق إيـد
علميني يـا بنيـه كـم صفحـات (الكتـاب) ؟ = ليت تقرينه علـي .. وتختمينـه (بالحديـد)
البـلا كـلٍ يعرفـه مـا يغطـيـه الضـبـاب = البلا أنتي .. وحبـك .. والغـرام اللـي أكيـد
آتصنع فرحتي .. والغيـر يشكـي مـن عـذاب = ما بغيت اشكـي لأنـي خايـفٍ لاجيـب عيـد
مقتنع في كل حاجـه وادري إن فعلـي صـواب = وادري الشكـوه لغيـر الله صـداهـا مايفـيـد
عايش حياتي بالسعه والضيق عندي كـــالسـراب = وإن بكيت من الزمـن .. مانيـب والله الوحيـد
كم واحدٍ يبكـي إلـى منـه لمـح زول الغـراب = مطاوع البدعـه ولاهـو مفتكـر يـوم الوعيـد
يالله تغفر لي إلـى منـه آتـى وقـت الحسـاب = وترحم الي عزنـي مـن عادنـي طفـلٍ مهيـد
إن عطيت اشبـح يمينـي كنهـا وبـل السحـاب = وما امد الشـيء الا .. يصبـح بنوعـه فريـد
ما بخلت إن كان لي قوه علـى قهـر الصعـاب = وإن بخلت.. فــنار قلبي تذوب اكـوام الجليـد
(البطاقـه) واسحبوهـا لعنبـو بنـك الخـراب = وش عاد تنفع في يديني .. دام مافيها رصيـد !؟
مابغيت الا الستيره ومسنـدي طيـب الصحـاب = والجماعه عزوتي لا صـار لـي وقـتٍ شديـد
وإن وطا حظي بقاعٍ .. او على فـوق الهظـاب = يكفـي إن الله وهبنـي ذا الكتابـه والقصـيـد
بس ابسأل .. من عيونك واضح انك بأضطراب ؟ = علمينـي والا بصـرك خابـرٍ راسـك عنيـد
وجهزي سيفك .. وسهمك .. وطعنيني بالحـراب = إن كان ناوي في بديلك .. ليتنـي ارجـع فقيـد
ودامني حيٍ دخيلـك .. اكتفـي فـي ذا الجـواب = يكفي ان حبك يضخ الدم في مجـرى الوريـد !؟

وسلامة روسكم



ماجد بن مهنا