صحيح من قال الهوى علة كبود
وانه على اللي مابعرفه مصيبه
كم واحدن في سكته صار مفقود
اقفا على وجهه يدور حبيبه
الحب مايعرف صغير ولا عود
كلن شكا منه شبابن وشيبه
من عابل دروب الهوى البيض والسود
يصبر على دروب الرضا والغصيبه
وانا ذبحني صاحبي ناعم العود
خلى جروحي وسط قلبي عطيبه
ابو العيون الناعسه الفاتنه ابزود
صفت هدبها مثل صف الكتيبه
فيه الحلا والزين والملح موجود
زينه طبيعي والمزايا عجيبه
ماشفت مثله في المخاليق ياسعود
لمن بعيد الدار ولمن قريبه
ضحيت من شانه وسويت مجهود
ابقي رضا المجمول يالله تجيبه