،
اي والله اني ضايق وخاطري شين = حتى زرار الثوب قـده يحدينـي
والدمعه اللي تدرج العين من حين = باهلها لـو قيـل لـي ياعوينـي
لاضقت ولديت نظري يسار ويمين = كني احسب وش بقى من سنينـي
ضيقة بريٍ حط بيـن المساجيـن = من عقب ماهو حر قد هو سجيني
ادخله وسط السجن كيد الملاعين = ولا له على ثبت البراءه عوينـي
وجدي وجوده يوم جروه ببزيـن = وقالوا عليك اعدام وارج المعيني
ويصيح تكفون اجلو الحكم بعديـن = خلو حدى عيال القتيـل يحكينـي
وعطوني القرآن واحلف له بديـن = اني بـريٍ يمكـن انـه يعفينـي
وياضيق صدري كلما قلت بيتيـن = وياوجد حالي كلمـا الـد عينـي
واصبحت فالشدات ضمن المخلين = والى ارتخت الايـام متحاولينـي
وانا الى اقفى صاحبي دون ثنتين = ماني مصوت له وهو لا يجينـي
،