يالله مسا خير قلبي منقبض وش به
من رهبة الناس ولا القلب متطير
يامعيراً شوق قلبي روح وانحشبه
مكينة القلب تصرف بشوق يامعير
مثل رذاذ المطر مايحيي العشبه
يحيي الفؤاد المغربل شوفة ( نوير )
هنوف بدواً طرف قلبي اتعشعشبه
العين تشفق لها والخافق مشير
قالت انا فيه موضوع بوشوشبه
قلت ارفعي الصوت لبى وجهك النير
قالت اخاف اتّغير قلت ويلشبه
اما اتغيّار لامانيب متغير
قالت قبل تنشب احساسي وتنشبه
ابن آدم ان طال عمره عمره قصير
لاتبلش القلب في حبك وتبلشبه
تراه قطت وجه من عاده صغير
وتقول بعدين هذي والله النشبه
اعلمك بالحقيقة وانته مخيّر
وطيت راسي وانا افكر وكنت اشبه
من حيرته السنين ومات متحير
واخذت موشة هوان اتنعنشبه
لديت فيها العيون وقلت ( يانوير )
لو قالو الناس لك يوماً ورح عشبه
حذفت عمري وراي وجيتك مسيّر
لكن كلاماً مالش به خير وش لش به
لاتذيرين الغلا ويروح متذير
وقولي الرمشك اليا جيت اتحرشبه
يرحمني شوي ياملعونة الخير