[محمد بن سعود]

جيتك بعد هالغياب المُرّ .. وإعذرني ،
بس كان عندي كلامٍ ، ودّي - أقوله :

( تغُيّر المُجتمع ) هو اللي - غيّرني ،
من الفقير ، لـ غنيّه ، لين .. مسؤوله

كم شيّ شفته بهالوقت ، ومحيّرني ،
( يموت واجد ) ! ولكن عاشت الدوله

( ويموت واحد ) وموته ماهو إيضرّني ،
تشوف بانْهم من آخر شيّ ، تعنّوله

( 23 ) / مرّت بي ... وأصبّرني ،
على شنو ؟ والعمّر ، لحضات مجهوله

في داخلي شيّ يصرخ ، لين ذكّرني ،
وشلون أنساه ، يا نسيان - معقوله ؟

شكراً لـ أبوي اللي ربّاني وكبّرني ،
علّمني ما أنجرف بالكون ، وسيوله

إن ضقت ؟ ما فيه أحد غيره ، يدبّرني
المشكله في وجوده ؟ يعني : محلوله

يغيب عني ، وإذا إحتجته - إيمرني
يوله عليه الخفوق ( وكيف ما يوله ) ؟

أنا أذكر إنه وانا جاهل ، يشبّرني ،
يا جعلني فدوة ، إيدينه .. مع زوله

من بعد ما كان لـ الصعبّه ، يعبّرني
اليوم معْ كل خطوه ، تشكي رجوله

كبرت يا بوي ،
قل !
وش اللي تامرني ؟
بجيب لك ما تبي ، من غير ( وشهوله ) ؟

كبّرت ! ماني على ما كان يخبرني ،
من قلب ! لا أحتاجني ؟ أبرتمّي - حوله

أما إنت ياللي عليك الوقت - غيّرني ،
فْصول هذا الزمن ، ما عادت فْصوله

لو يُجبر الكُلّ ، ما في شيّ يجبرني
الكون هذا عميق ! بـ عرضه وطوله

مثل ما جيتك ، أبرحل ! وانت إعذرني
ما عاد عندي كلام ٍ .. ودّي - أقوله !