[الشيخه شيخه]

يعرف الرجّال باسمه واسم جده وابـوه
وفعله الطيّب ليا الله على الطيب اومره
وان تردى يخلف الله على من خلّفـوه
اسمهم ما ينفعه لو مع اسمـه يذكـره
كم صبيٍ من مـوارث رجـالٍ ورثـوه
كاسبين الطايلـة بالسنيـن المعسـرة
حزّموه ولا تنّـدر مـع اللـي حزّمـوه
نعمهم يحرم على شاربـه مـا يقـدره
وكم صبيٍ من عرب واصلهم ما عرّبوه
لا بغى يفخر بهم مالقـى لـه مفخـرة
اعتلى صيته وكل الرجاجيـل اعرفـوه
ذمهم يكرم عنه ما يمس الـه شعـره
وللظروف احكام قبل المعاتب والشروه
والمواقـف تختلـف والامـور مقـدره
ماقفٍ تحسب حسابـه رجـالٍ وقّفـوه
كل منهم يبذل اللي معـه مـا يذخـره
وماقفٍ لا وقّفوه الرجـال استسهلـوه
يقصرونه والكـلام المطـوّل تقصـره
من يعلمنا عن اسلـوم اهلنـا علمـوه
ان حنا فـي غنـا واطلبـوه المعـذرة
نعرف اللي ما يعرفه ونمشي ما نتـوه
مع دروب الميمنة لا احتـدى للميسـرة
قدرنا عالي ولا نذكـر اللـي طمّنـوه
والرجال نشوفها جبال ما احدٍ نحقـره
وانتصرف بالذكـا والرزانـة والنبـوه
وانتغاضى عن بعض ما نشوف ونطمره
وانتجاهل بعض الاحيان كن فينا سفوه
ويتبيّن من ورى صافي المـا غثبـره
مـن يقدّرنـا نقـدّره تقديـره لاخـوه
ومن يجاملنـا نجاملـه قـدام نظـره
ومن يعادينا نعاديـه والكـل احربـوه
ما يحصل ضدّنا لـه نصيـرٍ ينصـره
نكتفى بالقدر هـذا لتوضيـح الشبـوه
ما نخص احدٍ بعينـه رجـل ولا مـره
من رضى نرضيه لو ما لفظ لا فضّ فوه
ومن زعل فيدوّر اقرب جـدار وينجـره
ما خلقنا نرخي الروس ونعبد الوجـوه
نعبد المولى ونحمـد عطـاه ونشكـره
قاله اللي لا هرج للرجاجيـل اسمعـوه
ومن يصم اذنه ولا يستمع مـا يجبـره
ان فهم وان ما فهم قلعته لا رحم ابـوه
قلعته خيـرٍ وخيـرة وفرقـاه اخيـره