ناسن يقولـون الخـلا للمهابيـل
يا حيف قولن ما عليـه الدلايـل
وش البلا قالوا سموم وغرابيـل
حتى الهوا ثاير بـروس النثايـل
قلنا لهم يا ناس ما فيـه تحليـل
هذا ولع ما يرمى بالطبـع مايـل
باحساسنا حدر الطلاح المظاليـل
مثل براد جنيـف لفـح القوايـل
قالوا يجينا الذيب لعسعس الليـل
واليا عوا يمكن بالانجـاد صايـل
قلنا لهم سرحان خاوا الرحاحيـل
الذيب هتاشـن بالاقفـار جايـل
اليا استلـج بخالياتـن مطاويـل
نطرب لصوته مع صياح الثعايـل
قالوا حيايـا والعقـارب مخاتيـل
معها الخنافس والقعـر والنمايـل
قلنا لهم من يقرا بالورد ما نيـل
فلا ينوشه فـي مساريـه طايـل
قالوا بعيدن ما يجي فيه كوكتيـل
ولا نشوف الا النيـاق الهمايـل
قلنا لهم مشروبنا البـن بالهيـل
على لهيب الرمث والدعب سايـل
ومطعومنا صيد الجبل والغراميـل
يا حلوها تسوا من الضان حايـل
قالوا عديم من الكنب لرتخى الحيل
حتى السرير سليب هاي وظلايـل
قلنا الكنب جرفن على جاله نقيـل
والا السرير براس طعسن تهايـل
قالوا ديارن ما بها قال مـع قيـل
ولا نشوف من المخاليـق دايـل
قلنا فضول الهرج ما فيه تفضيـل
غير النميمـه والمكـر والحبايـل
يكفي عزيف الريح بين الجناديـل
والطير لغنا وابـو فـلان شايـل
قالوا نريد سلومكم يـا رجاجيـل
اليـا نزلتـوا خاليـات الدهايـل
قلنا الكرم والخير ما فيـه تمهيـل
ومقدرين اهل الفعـول الصمايـل
وانريد حامل دين زيـن التماثيـل
صميدعن مبـداه طيـب الفعايـل
ونزرا على اللي بالخلا يلوي الذيل
مشاكس ربوعه سويـد العمايـل
قالوا خلصنا ما نقـول المخابيـل
الا رجالـن مـن قـروم القبايـل
لاصارت علوم الخلا ما بها ميـل
يسلم هواكم يـا عيـال الحمايـل