ياعاشق عن سيرة الحب سولفت=جسمك سليم ورمش عينك يرفي
لو ذقت من لوعاته عرفت وتعرفت=واعلنت بالواقع وقوفك بصفي
انا على درب المحبه تكلفت=عطشان واطرد لي سراب مقفي
ابحرت في بحر المحبين وانكفت=وصفقت من كفي على راح كفي
وعند النهايه شفت بالحب ماعفت=وسحبت من سجل المحبه ملفي
لو المدى وقت مضى ماتحسفت=اخذت من طرد العنا مايكفي
بس البلا من موقف فيه وقفت=على شفا رجم طويل مشفي
رجم العنا اللي ليتني فيه ماشرفت=ولاشفت من شوفه على شف شفي
مخلوق ماشفته على كثر ماشفت=ورى الستار من الجمال متخفي
يصد عن هرجي وهو يفهم الكفت=يبيني اصفق راح كفي بكفي