::::
مالون ياشعر شربتك عزيمة
كود العنا والهم ومواعد الجان
لو قلت ماترضى علي الهضيمة
مالذت في قلبي وأنا أشوف الأضعان
لابوك لابو من يحطك نديمة
عز الله أنك برت ياذرب الأيمان
أزعل عليك من العروق السقيمة
ولا أنت لك معنى بروحي ولك شان
يسري بي الهاجس وأعدي رحيمة
وأرجع وأنا قلبي من أرباعه أثمان
وياللي على الساحل تذاري نسيمه
تغريك قيفاني وترسل بقيفان
علقت بأرقاب القوافي تميمة
وأنحيت عذالي وباعدت الأوطان
من حرص رعاش الضلوع الكليمة
ولا أنت في عيني من الناس منصان
لك ميسم ووسم ووسام ووسيمة
في الصدر من حزني ليا صرف الأوزان
والشاهد الله لك بروحي خريمة
وإن قلت وإن ماقلت يامطرق البان
عين بلاشوفك تسمى يتيمة
وسمع بلا سمعك مسامعه نقصان
والصبر في هجرك ضياع وهزيمة
لو باكسب العالم وباخسرك خسران
جانبت من شانك وجيه حشيمة
وأصحاب وأحباب وعوارف وعدوان
من خوف لاكلمة تمرك نهيمة
وتردها دمعة على حمر الأوجان
وان كان تبغاها مقام وقيمة
شف كم خسرت أنسان في دمعة أنسان
حسبي عليك من العهود القديمة
ياصغر ماباقي وياكبر ماكان
وصلك ظليمة واعتزالك ظليمة
ومطاول الثنتين غرباله ألوان
يرضى الخصيم إليا أقتضى من خصيمه
ولاأنت بمحل الروح داين ومدان
أنصاك شيمة وابتعد عنك شيمة
واللي عذلني فيك ماهو بغلطان
لـشـاعـر / خـالـد العتيبي