لاتسألوني عن سبب دمعة العين
والله مدري دمعتي وش سببها
يجوز تبكي من بعد ناس غالين
ويجوز تبكي حين ساعة غضبها
دنيا غريبه وماعرفنا لها زين
محدن على طيبه بيومن كسبها
لو هي صفت لك يوم وإلا بيومين
بالثالثه عينك تبلل هدبها
لا واهنيك يادموع البزارين
من قبل لاتنزل ملبى طلبها
وانا حياتي كلها بين نارين
والنار ويل اللي يطاول لهبها
ابكي من الحيره وابكي من البين
وإلا من هموم الزمان وتعبها
الدمع واجد والمشاكل ملايين
لاعاد تسأل دمعتي وش سببها