،
يا عساس الشعور إستشعر الأحوال
أنا نفسي معـاك ، تحرر أنفاسي !
تمـر الذكريـات ، ومـا تمـر البال
عسى ما ضايقك صمتي وهوجاسي !
يزال الخوف مني ، والتعب ما زال
ويقسى في بعادك قلبي القاسي !
حزين ، وضحكتي ملت من الترحال
تسافر في وجيه أحبابي وناسي !
اماري في جروحك عندهم وأختال
كبرت ، وما كبرت إلا على ياسي !
كثر ماشلت عنك ، خاطري ماشال
وكثر ماكان راسي فالجفا راسي !
تقاصرت المسافه ، والدروب طوال
وعلى باب العتب وقفت حراسي !
متى نلقى .. على شرهاتنا مدخال
ومتى قلبك يلين .. وينكسر باسي ؟
اخاف .. الوقت يسرقنا على هالحال
واخاف انك نسيت ، ويصدق إحساسي !
