[الجويّر]

اشهد اني رحت غلطه في هواي = غلطة ٍ ضاعت بها كل السنين

ضاعت آمالي وضاع احلى رجاي = يوم خلّي قال حنا راحلين

قال لي ارجوك لاتمشي وراي = واحفظ الاسرار عندك لاتبين

قلت ليه الصد ياغاية مناي = كيف قلبك طاوعك ماتقعدين

كيف افرّط بك بعد ماانتي معاي = ماني ابصاحي واهدك تبعدين

انتي الانوار في عالي سماي = ياسنا شمس ٍ علينا تشرقين

من غلاك ازداد للعالم غلاي = مبتسم للناس وانتي تخبرين

وشايدات قصور حبك في حشاي = كلها لك بس رجواها تجين

ماذكر اني فيك باخل في عطاي = وكان عندك شي . قولي وش تبين

اطلبي لو كان مطلوبك فناي = بس شغله واحده لاتهجرين

قالت ارجوك الخطا ماهو خطاي = ابتعد بالله يابن الاكرمين

ماغصبتك بالهوا تتبع هواي = شوف غيري بالمحبه عاشقين

قلت يعني بالوفا هذا جزاي = قالت اسمحلي ترى اهلي ناطرين

قلت دربك سمح ياسبّـة عناي = ابعدي مادام ودك تبعدين

الله ايهنـّـيك ياداي ودواي = في حياتك تنعمين وتسعدين

ويوم قفـّـت طحت من خافي بلاي = وشبت النيران ياربي تعين

منصدم كيف اتركتني في عماي = واتركت قلبي وعيني حايرين

من بعدها بالعزا يجبر عزاي = أو ينسـّـيني غلا صافي الجبين

والوكاد اصبحت غلطه في هواي = مشقي ٍ روحي وغيري مهتنين




وسلامتكم




الشاعر / سعود رتيبان الجويّر