[الجويّر]

ماني بردّ الراس لهروج جهـّال = وشين المجال استضوقه عن مجالي

ارفع مقامي عن خبيثين الاعمال = اللي يساوون الحرام ابحلالي

ياللي تحسب انك فهيم ٍ ورجـّـال = المرجله ماهيب لبس العقالي

المرجله لو هي بترسيمة اعقال = ماكان به شرواك (عوق) العيالي

المرجله لاصرت للخلق مدهال = وصافي النوايا ضاري ٍ للفعالي

واللسانك بحق ٍ مقوله ليا قال = متعفف ٍ بهتان قيل ٍ وقالي

واكبدي اللي حافها ظيم سلاّل = والعين جاها من كراها جفالي

قزيت حلو النوم من هاجس ٍ طال = اسهر واخايل بالفكر ماجرالي

اشوف شي ٍ غادي ٍ له تميـّال = مال العدل واليوم وين العدالي

لين استمال اجبال يافارس اطوال = ياخوك مالنّ الجبال الطوالي

ياخوك لو دمعي على محجري سال = لاتحسب انه مدمع الذل سالي

دمعي من حمول ٍ بها القلب شيـّال = شليتها واكفيت شلّي لحالي

شليتها والطيب مازال تمثال = متمسكن ٍ في داخلي مايزالي

ماقول طاح الحيل ياعمّ ياخال = هذا لزوم الطيب شلّ الثقالي

وانا تراني مقتديبك بالافعال = لو يرتكن لي مرهبات الليالي

عزالله ان الطيب عسر ٍ وغربال = درب الوعر دربه رفيع وهيالي

وانا بدربه كالمراسيل مرسال = مقفي ومقبل لين شابن قذالي

افداك يافارس ولك يرخص الحال = وانا سنودك ياكريم السبالي

ويفداك من حطت على الساق خلخال = ترف ٍ عليها رمش مثل الضلالي

ويفداك من قوّل على الناس الاقوال = اللي قعاده حرّموه الرجالي

ياسيف شامان ٍ منا كل خيـّال = اللي احتمابه بالسيوف السلالي

انت العوض عن خاسر المال والحال = واللي بغيته والذي قد غدالي

وشلون اردّ الراس لهروج جهـّال = وانا على الرفعات وياك عالي

والخاتمه من مورد0اصداره البال = صلوا على مرسول عز الجلالي




وسلامتكم




الشاعر / سعود رتيبان الجويّر