يابوي جعلـك للبقـا والمكاسيـب
عمري بدونك يالذَّرا ويش أبي بـه
يابوي تسأل عن شفـاك المراقيـب
طلعه سواتـك للنوايـف غريبـه
ليه المرض مايعرف الزين والعيب
مايـدري أنّـك للمخاليـق هيبـه
أبسألك وش به غزا وجهك الشّيـب
والقلب لايـع والنواظـر شحيبـه
وشبك تحاتي لانوى الموت تغريب
تخشـى عليّـه باللّيالـي الكئيبـه
خذ دلّتك واركى على مسند الجيـب
وعطني شماغك بلثمه واحتمي بـه
ونروّح لأرضٍ بها العشب والطيب
وتسمع كلامٍ يالغـلا تحتفـي بـه
يابوي بنتك لاانحكـى بالتّجاريـب
كلن يشق لهيبـه الصّيـت جيبـه
يابوي ماني من سـواة المخاريـب
اللّي تجيـب لعليـه القـوم خيبـه
وماني من اللّي لامشت حفّها الرّيب
أنـا مـن اللّـي مايدنّـس حليبـه
مرفوع شاني عن غرام المكاتيـب
وأكبر من إنّي أرتضـي بالحبيبـه
أنا غرامـي لاابتـدوا بالتّراحيـب
نفوس الأوادم من وجودي رحيبـه
وإن كان زيني فتنـة ٍ للمصاويـب
لأحط وجهـي بالحريـق ولهيبـه
زيني أبيعه وأشتري سمعه الطّيـب
إسم ٍ ينومس بالصّـروح الذّهيبـه
وإن كان عندي بالحلا شي ٍ إصعيب
عندي جـدودٍ مارضـت بالغليبـه
دموع القبايل في لقانـا مساكيـب
كـن المقابـر لاحضرنـا قريبـه
خضّبت لك كفي من العز تخضيب
ورفعت راسي للنجـوم الصّعيبـه
طلع المعالي ماانحكـم للشواريـب
بنتٍ وأناطح فارس القـوم طيبـه
والله لأسدّك بالفعـول المصاليـب
والله لأعينك بالرّخـا والمصيبـه
وياشيخي إبشر لوتـدور الدواليـب
بنتك إلا منّه عوى الذيب ( ذيبـه )
كفـــــــو والله يامطنوخه من طيب راس ابيش والله
وانتي انشالله انش واصله فيه
وعلى فكره ؟
هذه القصيده إهداء لمـن أضـع هامتـي تحـت ( قدميـه )
إهــداء الــى ..............أبـــي ................!!!
شفتي الكلمه هذي ! هي اللي ترفع من قدرش وتكسبين فيها رضا ربش والديش واحترام الناس
صح لسانش ومع اطيب تحيه