[سعود القويعان]

المشاركة الأصلية كتبت بواسطة فلاح بن ملبز

كان الفقر يابنت الأجواد لي عيـب=تـرا المراجـل ياحسينـه غناتـي

أتعب على كسب المعاريف والطيب=مرخص على شان المراجل حياتي

ولا المعيشه عايش(ن) عيشة الذيب=يومٍ(ن) يجوع ويوم يلقـى المباتـي

ورزقي على اللي يعلم السر والغيب=واللي كتـب بلـوح ملـزوم ياتـي

ماني بوارث مال قـارون وشعيـب=ولا ملكـت النيـل و لا الفـراتـي

عندي أخير من الذهب والمكاسيـب=أدي الفروض الخمس وأدفع زكاتي

وأخاوي رجال الوفـا والمواجيـب=فريس قـوم ولا تحـب الشماتـي

وأفرح بضيفي مثل طي المعازيـب=كسب الجماله والكرم من صفاتـي

وأدرى عن المنقود واللاش والعيب=يذهل عدوي فـي حياتـه سكاتـي

وأعتز في ربعن تحل المصاعيـب=أهل الفعول المعجـزه المرعباتـي

أهل الوفا والطيب وحرش العراقيب=امطير ربعـي مرعبيـن العداتـي

ربعي ليا صكـت عليـه المغاليـب=هم مسندي با اللين و بالمعسراتـي

وأبفتخـر مـن دون ذم الأجانيـب=مـدام حمـران النواظـر عباتـي

واليوم زارك من قصيدي مناديـب=أبيات شعري وأحفظيهـا وصاتـي

الفقر ماهو لا فضا البوك والجيب؟=الفقـر فقـر المرجلـه يافتاتـي.!

والطيب يارث من تسـد المطاليـب=تموت وتبقـى علومهـا الوافياتـي

والمرجله مثل الذهـب فالمراقيـب=واللي عشقهـا ينطـح الموجباتـي

ومن لا كسبها شب ما جابها الشيب!=والعمر فرصة حي قبـل المماتـي

أما ذكروني مثل عذب المشاريـب=ولا أوقفوا دمع العزى في وفاتـي

والمودمـي لابـد مابـه عذاريـب=ولا ني معـدد بالقصيـد حسناتـي

لكن عطيتك عن حياتـي تجاريـب=يوم المراجل ساس ربعـي وذاتـي

وصلاة ربي أعداد خـط المكاتيـب=وعـدد طيـورٍ بالسمـا حايماتـي

على محمد صادق العلـم ومصيـب=عليـه منـي كـل يـومٍ صلاتـي

أرحب يا أبن قويعان

وصح لسانك مليون

ولاهنت على ذا القصيدة الجزله

ونعم بحمران النواظر

كفيت و وفيت يا أبن قويعان

ولاتحرمنا من مشاركاتك الرائعه

ولك جزيل الشكر

مشرفنا الفاضل/ فلاح ابن ملبز

يدوم لك البقا يابن ملبز

وصح بدنك مليون وانا لكرمك الحاتمي ممنون

وماعليكم زود ياعيال مرزوق

واشااااادتك فخر كبير لي يابن ملبز

بيض الله وجهك ولاهنت يالغالي

بأذن الله سأشارك بما يعز وعلى قلبي

واتمنى ان اكون فيه اوفق الى استحسان ذائقتك يالذرب

لك مودتي و احترامي

اخوك سعود بن قويعان