اقتباس:
|
المشاركة الأصلية كتبت بواسطة سعود القويعان
بسم الله الرحمن الرحيم
مصافحتي الأولى واتمنى ان تحوز على رضاكم
وهي عباره عن بطاقه شخصيه لي لتتعرفون
ضيفكم ومحبكم ياعيال مرزوق
(( ياحسينه))
كان الفقر يابنت الأجواد لي عيـب = تـرا المراجـل ياحسينـه غناتـي
أتعب على كسب المعاريف والطيب = مرخص على شان المراجل حياتـي
ولا المعيشه عايش(ن) عيشة الذيب = يومٍ(ن) يجوع ويوم يلقـى المباتـي
ورزقي على اللي يعلم السر والغيب = واللي كتـب بلـوح ملـزوم ياتـي
ماني بوارث مال قـارون وشعيـب = ولا ملكـت النيـل و لا الفـراتـي
عندي أخير من الذهب والمكاسيب = أدي الفروض الخمس وأدفع زكاتي
وأخاوي رجال الوفا والمواجيب = فريس قـوم ولا تحـب الشماتـي
وأفرح بضيفي مثل طي المعازيـب = كسب الجماله والكرم من صفاتـي
وأدرى عن المنقود واللاش والعيب = يذهل عدوي فـي حياتـه سكاتـي
وأعتز في ربعن تحـل المصاعيـب = أهل الفعول المعجـزه المرعباتـي
أهل الوفا والطيب وحرش العراقيب = امطير ربعـي مرعبيـن العداتـي
ربعي ليا صكـت عليـه المغاليـب = هم مسندي با اللين و بالمعسراتـي
وأبفتخـر مـن دون ذم الأجانيـب = مـدام حمـران النواظـر عباتـي
واليوم زارك من قصيـدي مناديـب = أبيات شعري وأحفظيهـا وصاتـي
الفقر ماهو لا فضا البوك والجيب؟ = الفقـر فقـر المرجلـه يافتـاتـي.!
والطيب يارث من تسـد المطاليـب = تموت وتبقـى علومهـا الوافياتـي
والمرجله مثل الذهـب فالمراقيـب = واللي عشقهـا ينطـح الموجباتـي
ومن لا كسبها شب ما جابها الشيب! = والعمر فرصة حي قبـل المماتـي
أما ذكروني مثل عذب المشاريـب = ولا أوقفوا دمع العزى فـي وفاتـي
والمودمـي لابـد مابـه عذاريـب = ولا ني معـدد بالقصيـد حسناتـي
لكن عطيتك عن حياتـي تجاريـب = يوم المراجل ساس ربعـي وذاتـي
وصلاة ربي أعداد خـط المكاتيـب = وعـدد طيـورٍ بالسمـا حايماتـي
على محمد صادق العلـم ومصيـب = عليه مني كل يومٍ صلاتي
وسلامتكم
عسى هذه الأبيات ينفع الله بها ويجعلني أن أكون عند حسن ظنكم...
اخوكم سعود بن نضاد بن قويعان المطيري |
الشاعر الجميل....
سعود المطيري.
حياك الله وبياك يالقرم بين اهلك وناسك...
وصح االله لساااااااااااااانك ملاااايين مايسدون يالقرم....
قصيده جزله وتعريف وافي وكافي... لتكون بطاقه إعجاب وذهول من قبلنا لك....
يسلم راسك وبيض الله وجهك
ولاهنت
اختك
نشميه