صباح الخير ,,
لا أراكم الله مكرها بعزيز ,,,
آه من هم(ن) على قلبي سرا=لا خمد هم(ن) لفا هم(ن) يباري
المصايب حطمت قلبي اجهرا=وللمشاكل فاتح(ن) احساب جاري
يرحم الله من على بالي طرا=مانسيته دايم(ن) حاضر وطاري
البطان اوسيع ماعمره زرا=ولايبين بالزعل لوكان زاري
رحمة الله تنزل بذيك المرا=يرحم الله من توفت بالعصاري
من خذوها والعيون اللي ترا=انفجرت من البكي والله داري
ومن توفت ماعرفت اللي جرا=وقفت ساعات عمري ياعذاري
ماذكرت الا العزا في المقبرا=ولا نسيت لحظات دفنه والتواري
الجروح جداد والحيل افترا=والهموم اتلوفني لوف الذواري
ماأذوق الزاد وعيوني اسهرا=كنها بترجع على طول انتظاري
والبشر في نومها محدن درا=وان دروا محدن على الفزعات ضاري
اتصدد من مشاري لا يرا=لا يشوف الموت في عيون انكساري
لا لمحني هل مع(ن) احمرا=ثم نصاني رافع ايدينه يماري
ابي امي جيب امي او ترا=بشعل الدنيا حريق وفيك ناري
كلمتين(ن) قالها فز وجرا=مايهمه غير لعبه بالقواري
قامت الدنيا تضيق وتصغرا=والهموم بزود وللضيقه مواري
ليت لي قلب(ن)مثل غيري برا=وللسعاده سوق بين بايع وشاري
القدر مكتوب والعين بترا=ومانكتب باللوح لك صاير وجاري
والسحاب اللي ترجد وازبرا=جعل هتانه على قبرش عذاري
وتنقلب هــالأرض عشب(ن) اخضرا=عقب ماهي جرد ربع بالصحاري
وسلامتكم
اللهم اغفرلها وارحمها برحمتك