الله من قلبٍ عوى عويـت الذيـب
ذيب عوى لجت ضلوعـه ولجـي
عليك ياراعي العيـون المهاديـب
سـودٍ مضاليـلٍ وسـاع ٍ وبجـي
سودٍ تشذب بسرة القلـب تشذيـب
طحت بخطرهـن يالله انـك تنجـي
سهومهن تسطي على القلب وتصيب
تخـج صنـدوق المعاليـق خجـي
ياصاحبي حبـك لقلبـي عواقيـب
ارفق علي شـوي قبـل استلجـي
يا اللي عليك عيون الامه مراقيـب
تقـول بيـن شفـاك درٍ يمـجـي
والخد براق المـزون المهاضيـب
اللي رعوده رجـت القـاع رجـي
يامنوتـي مافيـه شـك ولاريـب
منساك كود انسى صيامي وحجـي
يابو نهـودٍ شلعـن مقـدم الجيـب
كمشمشٍ عرقه من المـاء ينجـي
من فوقهن شقرٍ تغذى على الطيـب
ريح الشمطري في طرفهن يعجـي
ذيل اشقرٍ ينسف خـلاف العراقيـب
تطلب عيالـه بالمهـر والترجـي
هزت وزرفـات السبايـا جناديـب
لوما شليل الصبر والمـال هجـي
ذبحتنـي ياسيـد كـل الرعابيـب
فجيت قلبي يأريـش العيـن فجـي
فجن مثل مظراب شلفـاء تراحيـب
شلفاءاً تخل الـدم الاحمـر يكجـي
لا وردة من كف مـرو المغاليـب
والخيل كاسيهـا ضبـابٍ وعجـي
ياعاذل المشتاق مابالهـوى عيـب
ماذقت لذاته عسـى امـك تدجـي
لو ذقت من حلوه ومـره تجاريـب
مالمـت طـراد البنـي الغنـجـي
نجل العيون مزعـلات الخطاطيـب
شعـوٍ عـذاب مقطعيـن الفرجـي
يم الحبيب اللي هروجـه تعاجيـب
ياعيـن لديلـه ويارجـل سـجـي
وعسا ان تحوز هذه القصيده على اعجابكم وهي منقوله ولاأعرف من قائلها للأسف،،،،