وهي اهداء الى الاخ العزيز / اشهب اللال
اسبوع مر ولا وصل منك مرسال=ياقو قلبك كيف تقطعني اسبوع
الجوع كافر وأنت ماترحم الحال=وانا عليك من الوله ميتأ جوع
يلي غيابك صعب يطري على البال=تركتني ضايق وحاير ومفجوع
ماكني الا شايب فاقد عيال=وماكنك الا محرم حق مشروع
يفوع لك قلبي ليا مر الاطلال=ياليت مالي قلب يشتاق ويفوع
حسبي عليك شلون قطعت الامال=بأأأموت لاصار الامل فيك مقطوع
ياصاحبي ماكل نزال رحال=أنت الحيا من وين مارحت متبوع
نسياني لزولأ بالاعماق يختال=اصعب على صاحبك من حبة الكوع
لو الثمن في شوفتك عمر رجال=كان الثمن من يوم ماغبت مدفوع
ولو القدر ماتم قوله ليا قال=ماضاق صدر ولا أنحنى راس مرفوع
ياصاحبي عشقتني فعل وخصال=وانا عشقتك شعر واحساس وطبوع
وشلون تتركني كذا (لأشهب اللال)=وقدام عيني تجف ينبوع ينبوع
وانا عشانك جيت والغيم همال=اسيل الوديان وأداحم جموع
ماردني عنك سواليف عذال=تزعل علي ربوع وتقدر ربوع
كان المهم أعيشك جنون ووصال=ويكون لي كلمه ولي راي مسموع
واليوم ضاقتبي من الجال للجال=فرقاك تقصم ظهر وتحز وتلوع
لو جيت شفت الحال ماسرك الحال=في غيبتك ضايق وحاير ومفجوع
هذا غياب أسبوع وشلون لو طال=طالبك لايطول غيابك عن اسبوع
للقادم بقوه / محمد جارالله السهلي